معرفة الله رحلة تبدأها هنا و بتكمّل للأبد. وكل شوية يعلن لك صفة عنه. مش بس تعرفها لكن تدركها و تختبرها. علشان كدة من حقك تسأل و تدور و لحد لما تلاقي ربنا و كل لما تكون صادق و حقيقي في طلبك هيجاوب ، لأنه ببساطة بيحبك و عايز يوصلك. في فصل الصيف وتحديداً على شاطئ البحر بتلاقي أطفال معاها أدوات زي الجروف والجردل و بيلعبوا على الرملة، و كتير منهم بيلعب لعبة مشهورة ويمكن إحنا كمان كنا بنلعبها واللعبة دي هى إن الطفل بيعمل حفرة كبيرة و يحاول يجيب ميه من البحر و يحطها في الحفرة . وفي منهم بيكون متخيل إنه هيقدر ينقل البحر كله في الحفرة الصغيرة بتاعته .. يمكن تكون بتبتسم وبتضحك و بتقول إن الأطفال بريئة وماعندهاش منطق كفاية ، بس تخيل إن ده بيحصل لحد النهاردة مع الكبار. لما شخص يحاول يفهم الله الغير محدود جوه عقله المحدود هنا و دلوقتي. الله خالق الكون ده كله بعظمته و تنوع خليقته صعب جدا تستوعبه بالكامل جوه عقل بشري، علي الأقل مش و احنا هنا علي الأرض. فكرة إننا نستخدم حاجات مش عارفين عنها كل حاجة بنستخدمها في الحياة العادية اليومية زي الكمبيوتر مثلا، أنت مش عارف عنه كل حاجة ومع ذلك بتستخدمه وكل لما بتستخدمه أكتر بتكتشف في حاجات أكتر و نفس الفكرة في الموبايل و حاجات تانية كتير بيكون عندك معلومات بسيطة عنها ومع ذلك بتستخدمها و مع الوقت بتعرف إمكانياتها أكتر ، حتى العلاقات مع البشر بتاخد وقت علشان تبني علاقة مع شخص و كل لما عاشرته أكتر بتكتشف فيه صفات أكتر و بتعرفه أكتر ..وده بالظبط بيحصل في علاقتك بالله، لكن الله أعلن عن نفسه بطرق كتيرة سواء في الطبيعة أو في الكتاب المقدس ، ولو ركزت في معاملاتك اليومية هتلاقيه قريب منك زي ما الفيلسوف سي أس لويس قال : "ليلة بعد أخرى كنت أشعر عندما يسرح ذهني و لو لثوان بعيدا عن عملي بقرب الله الثابت و الشديد الذي لم أكن أرغب بجدّ وهمة أن أتقابل مع، حتى استسلمت و أعترفت أن الله هو الله وركعت وصليت، وربما هذه الليلة تغّير أكثر شخص في كل أنحاء إنجلترا كان يعاني من الإكتئاب وكان يمتنع عن معرفة الله" .