تعودنا في حياتنا ومجتمعاتنا إن مش سهل نسأل أو نقول إن عندنا شكوك ناحيه إيماننا أو إننا مش مقتنعين بيه بالمره ..

وده بسبب إننا كمجتمع بنقدس الأفكار الموروثة واللي منها الأيمان بالدين اللي إتولدنا عليه وبنفتكر إن مجرد السؤال معناه اننا كفرنا بوجود الله وده بيحسسنا بالذنب لإننا معندناش إيمان قوي زي الناس اللي حوالينا وبيخلينا نحاول نثبت لنفسنا وللناس اننا فعلا معندناش أي شكوك تجاه إيماننا ..لكن الحقيقة ده بيحطنا قصاد سؤال صريح جداً.. يا تري إحنا مقتنعين بكل اللي بيحصل في حياتنا من ظلم أو ألم .. طب قادرين نشوف عدل الله إزاي وسط الشر اللي بنشوفه حوالينا؟؟

طب يا تري الله شايف الحيرة اللي جوانا ؟؟

اللي عايز أقوله ليك وأفكر نفسي بيه هو إن الله هو اللي خلق لينا العقل والمشاعر وانه بيحترم جدا اللي بنمر بيه .. مش بس كدا هو كمان بيتعامل معاه برحمه ولطف لإنه أكيد عايزنا لما نؤمن بحاجه نؤمن بيها عن اقتناع ويكون إيماننا ثابت وحقيقي مش بس فكره إتعلمناها وخلاص ...