فى دراسات كثيرة توصلت ان سياسات "المنع" أو "التحريم" او "التجريم" فشلت انها تقلل من أي ظاهرة أو سلوك. ببساطة لأنها تجبر الناس على البحث عن طرق فى الضلمه للوصول لنفس الهدف المُحَّرم. وفى نفس الوقت الشخص اللى بيحاول يمنع شخص اخر ده غالبا بيعمل كده من غير اى حوار او نقاش مسُبَق و فى اغلب الوقت الطرف التانى ملوش اى كلمه او قرار في المنع والمنح.

هل الله فعلا حاطط لنا ليستة ممنوعات؟ هل الله برغم حكمته الكافية مايعرفش ان "الممنوع مرغوب"؟ هل يعقل ان الله يخلق جوانا قدُرات زى الضحك و الغناء و الاستمتاع و بعدين يمنعها عنا؟ طب ليه؟ ليه يخلق جوانا الاحتياج و بعدين يمنعنا من تلبيته؟ صعب اوى نصدق أن الله بالشكل ده. مستحيل يبقى الله بيحبنا و خلق لنا عقل واعى و بيفكر، بس فى نفس الوقت يرفض اننا ندير و نضبط نفسنا و يبقى لازم قائمة ممنوعات عشان نعيش صح!