وجدتها .. صرخة أرشميدس اللي جري في الشارع عريان لما أكتشف قانون الطفو وده لما كُلِّف بإثبات أن التاج الجديد لهيرون (ملك سيراكيوز) ماكنش من الذهب الخالص زي ما  ادّعى الصائغ، و القصة أتكتبت لأول مرة في القرن الأول ق.م، عن طريق المهندس المعماري الروماني فيتروفيوس. وفعلا قدر أرشميدس أنه يحدد أن التاج ليس من الذهب الخالص، نظرًا لحجم المياه المنسكبة؛ لأنه على الرغم من أن وزن التاج كان بالظبط  زي وزن الذهب الذي أعطاه الملك لصانع التاج، كان الحجم مختلفًا طبقًا لاختلاف كثافة المعادن.. و القانون ده بيُستخدم كتير في السباحة ولو حد لسه بيتعلم العوم دايما يتقاله .. "الميه هتشيلك" وده مش كلام لكن ده قانون و له اثباتاته. أرشميدس عرف  المعلومة و صدقها لكنه لسه ما جربش فهو لسه مش مؤمن بيها .. الإيمان بيجي لما يرمي نفسه على المياه بدون مقاومة فيلقيها بتشيله. وده تعريف الإيمان ببساطة وفقا لرسالة العبرانين في إصحاح ١١إصحاح أبطال الإيمان زي ما بيطلق عليه و بالتحديد أية 1"  وَأَمَّا الإِيمَانُ فَهُوَ الثِّقَةُ بِمَا يُرْجَى وَالإِيقَانُ بِأُمُورٍ لاَ تُرَى." وتعريف تاني فالإيمان هو شىء منطقي عيوننا مش بتشوفه لكن العقل يفهمه وهو ضد العيان مش ضد المنطق .

ولو ركزت في الحياة ، هتلاقي إن في حاجات كتير موجودة و مؤمنين بيها رغم إن عيوننا مش شايفها. زي الهوا إحنا مش بنشوفه لكن مدركين ومقتنعين بوجوده و بنشوف تاثيره لما شوية هوا جامد يجي تلاقي ورق بيطير أو لو حتى فيها أشجار هتشوف ورق الشجر يتحرك أنت شايف تأثير الهوا لكن مش شايف الهوا نفسه ده غير كمان الموجات الكهرومغناطيسية اللي بتمشي في أسلاك الكهرباء و احنا مش بنشوف الكهرباء لكننا بنشوف لمبة منورة . وبنعرف بإن الكهرباء قطعت لما النور بيقطع يعني من تأثير الكهرباء، ده غير بقى رفيقك اليومي أو اللي معاك طول اليوم اللي هو:  الموبايل... إنت مش بتشوف الموجات اللي بتنقل الكلام لكن بتصدق و بتؤمن بإنك ينفع تتكلم في الجهاز ده و ينقل كلامك و تستقبل منه صوت حد تانى . يعني فكرة إنك تصدق في حاجة وتقتنع بها وعيونك مش شايفاه دي موجودة في الحياة . الفكرة هى قناعاتك وإثباتك المنطقي اللي بيأكد صحة اللي بتؤمن بيه ، علشان كدة نوعية الناس العقلانية اللي عندها إثباتات منطقية العقل عارفها و مقتنع بيها و هى بتعيش على أساسها دي أكتر ناس إيمانها ثابت ومهما أتغيرت الظروف من حواليها بيفضل إيمانها ثابت مش مجرد مشاعر أو شوية معلومات عارفها .